Evaluaziun da la ristga parodontala

Procentuala da la sanguinaziun suenter il sondagi (BOP)

La sanguinaziun suenter il sondagi (BOP) vegn determinada cun in sondagi lev fin al fund da la tastga cun ina sonda parodontala standardisada.

Il resultat è dicotom: positiv u negativ. La pressiun applitgada na duess betg surpassar 0.25N (25g).

La BOP vegn mesirada tar quatter lieus per dent (mesio-bucal, mez-bucal, disto-bucal e mez-oral). Il meglier fan ins quai quadrant per quadrant, l’emprim las mesiras bucalas e lura las oralas.

La valur da la sanguinaziun suenter il sondagi resulta dal dumber da lieus positivs dividì tras il dumber total da lieus, multiplitgà cun 100.

Dumber da tastgas parodontalas cun profunditads da sondagi ≥5mm

Quatter lieus per dent vegnan sondads cun precauziun (mesio-bucal, mez-bucal, disto-bucal e mez-lingual). Il dumber da las tastgas da 5mm u pli profundas vegn notà.

Tar l’evaluaziun da la ristga da progressiun da la malsogna vegn il dumber da tastgas residualas cun ina profunditad da sondagi da ≥5 mm giuditgà en il diagram funcziunal da l’evaluaziun da la ristga sco segund indicatur da ristga per ina recidiva da la malsogna. La scala è lineara, cun 2, 4, 6, 8, 10 e ≥12% sco valurs criticas sin il vectur.

Persunas cun fin a 4 tastgas residualas pon vegnir consideradas sco pazientas e pazients cun ina ristga relativamain bassa, persunas cun dapli che 8 tastgas residualas percunter sco persunas cun ina ristga auta per ina recidiva da la malsogna.

Dumber da dents persi

Per l’intent da questa evaluaziun da la ristga cumpiglia ina dentadira cumpletta 28 dents (senza dents da sapientscha). Dents da sapientscha ch’èn sa spustads mesialmain al lieu dals segunds molars vegnan quintads sco segunds molars.

Quintà vegn il dumber da dents persi da la dentadira senza ils terzs molars (28 dents), independentamain da lur substituziun. Er questa scala è lineara, cun 2, 4, 6, 8, 10 e ≥12 sco valurs criticas sin il vectur.

Persunas cun fin a 4 dents persi pon vegnir attribuidas ad ina categoria da ristga bassa, persunas cun dapli che 8 dents persi percunter ad ina categoria da ristga auta.

Procentuala da la perdita d’oss en relaziun cun la vegliadetgna da la pazienta u dal pazient

La procentuala da la perdita d’oss vegn stimada sin basa da radiografias dals dents posteriurs. Il lieu cun la pli gronda perdita dat la valur da la perdita d’oss.

Sco nivel da referenza da l’oss vala 1mm apical dal cunfin smalt-cement (CEJ). La perdita d’oss vegn stimada approximativamain en pass da 10%. En cas che radiografias periapicalas n’èn betg disponiblas, pon vegnir duvradas radiografias bitewing. Per questa stimaziun vegn la perdita d’oss calculada cun 10% per mm.

Tar l’evaluaziun da la ristga da progressiun da la malsogna vegn la dimensiun da la perdita da l’oss alveolar en relaziun cun la vegliadetgna da la pazienta u dal pazient stimada en il diagram funcziunal da l’evaluaziun da la ristga sco quart indicatur da ristga per ina recidiva da la malsogna.

Facturs sistemics

Las cumprovas las pli fundadas per ina midada da la predisposiziun per la malsogna e/u da la progressiun da la malsogna parodontala derivan da studis cun populaziuns cun diabetes mellitus dal tip I e dal tip II (dependent ed independent da l’insulina).

I sto vegnir resguardà che l’influenza dal diabetes sin las malsognas parodontalas è vegnida documentada tar pazientas e pazients cun malsognas parodontalas betg tractadas, entant che per pazientas e pazients tractads n’existan fin oz naginas cumprovas cleras. I para dentant raschunaivel da supponer che l’influenza da las cundiziuns sistemicas possia er pertutgar la recidiva da la malsogna.

Tar l’evaluaziun da la ristga da progressiun da la malsogna vegnan ils facturs sistemics, sch’els èn enconuschents, resguardads mo sco tschintgavel indicatur da ristga per ina recidiva da la malsogna en il diagram funcziunal da l’evaluaziun da la ristga. En quest cas vegn marcada per quest vectur la zona da ristga auta. Sch’els n’èn betg enconuschents u n’existan betg, na vegnan ils facturs sistemics betg resguardads per la valitaziun generala da la ristga.

Facturs d’ambient

Il consum da tabac, surtut en furma da fimar e main en furma da tabac da nas u da tabac da mastgar, influenzescha la predisposiziun ed il resultat dal tractament tar pazientas e pazients cun parodontitis cronica.

Tar l’evaluaziun da la ristga da progressiun da la malsogna ston facturs d’ambient sco il fimar vegnir resguardads en il diagram funcziunal da l’evaluaziun da la ristga sco sisavel factur da ristga per la progressiun da la malsogna parodontala.

Malgrà las cumprovas disponiblas anc paucas davart la connexiun tranter il fimar da cigarettas e resultats mendramentads durant la terapia parodontala da sustegn (SPT), para igl raschunaivel d’attribuir fimadras e fimaders ferms (≥20 cigarettas al di) durant la fasa da mantegniment ad ina gruppa cun ina ristga pli auta.

Entant che nunfimaders (NS) ed anteriurs fimaders (FS: dapi dapli che 5 onns senza fimar) han ina ristga relativamain bassa per ina recidiva da la parodontitis, han fimaders ferms (HS: definì sco fimar dapli ch’in pachet al di) cleramain ina ristga auta.

Fimaders occasiunals (OS: <10 cigarettas al di) e fimaders moderads (MS: 10-19 cigarettas al di) pon vegnir considerads sco persunas cun ina ristga moderada per la progressiun da la malsogna.

Referenza

LANG N P, TONETTI M S: Periodontal risk assessment (PRA) for patients in supportive periodontal therapy (SPT). Oral Health Prev Dent 1: 7-16 (2003).